عفواً .. القلب الذي طلبته غير متاح مؤقتاً !!

عفواً .. القلب الذي طلبته غير متاح مؤقتاً !!
قلبك قد يكون مُغلقاً .. أو خارج نطاق الخدمة !!

بتحصل كثير مش كدة ؟!

لما تكون في موقف محتاج فيه قلبك جداً .. وتيجي تطلبه متلاقيهوش !!

وانت واقف تصلي .. لسانك شغال .. لكن قلبك مش هنا خالص ..

نفسك تجيبه .. بس مش عارف !

وانت بتدعي .. لسانك بيقول ويطلب من ربنا .. وقلبك في وادي تاني خالص !!

لما بتسمع ان فلان مات .. وتروح معاهم علشان يدفنوه .. وتشوف المقابر بعينك .. وتشوف فلان وهو بيتقفل عليه لوحده ..

نفسك تبكي .. نفسك قلبك يذوق معنى الخوف من ربنا في الموقف ده ..

فتيجي تطلب قلبك .. متلاقيهوش !!

وانت صايم .. حاسس انك جعان ، أو عطشان .. بس مش حاسس بلذة الصيام ، رغم انك ممكن تكون عارف كويس فضل الصيام وثواب الصائمين .. بس برضو القلب مش هنا ..

في رمضان .. وانت بتصلي التراويح .. في عز جو العبادة والخشوع .. تيجي تطلب قلبك علشان يذوق الحلاوة واللذة .. متلاقيهوش ..

فينك يا قلب ؟!!

للأسف .. القلب غير متاح حالياً !!

أكيد بتحصل معانا كلنا .. ومحدش فينا معصوم ..

يبقى تعالوا نتعامل معاه على أنه مرض شائع لازم نشوف له علاج بإذن الله !!

في عالم الطب .. لما يحبوا يعالجوا أي مرض .. لازم يشخصوه الأول صح ..

علشان يقدروا يوصفوا الدواء الصح ..

طيب لو جينا نشخص حالتنا دي .. هنلاقي انها عبارة عن غياب مؤقت لحضور القلب ( القلب مشغول مؤقتاً ) ..

ولو تركنا الحالة كدة من غير علاج .. ممكن تتطور وتتحول إلى انغلاق تام في القلب ( والعياذ بالله )

يعني القلب يتقفل و يخرج تماماً عن نطاق الخدمة !!

" وقالوا قلوبنا غلف "
.........................

طيب لو جينا نشخص المرض ده ( انشغال القلب وعدم حضوره ) ..

تفتكروا تكون أسبابه إيه ؟!

ممكن يكون قلبك مشغول بحاجة تانية غيرك !!

( فلوس - بنات - عربيات - فسح وخروجات - الشغل ومشاكله - الزوجة والولاد .. وهلمّ جراً )

فتيجي تطلبه في عز ما انت محتاجله .. تلاقيه هناك عندهم .. مشغول بيهم .. ومش فاضيلك !

* * *

أو ممكن مثلاً تكون بتعمل ذنب معين ومُصر عليه .. فالذنب ده عامل حاجز بينك وبين قلبك .. وبيقطع أي اتصال ما بينكم ..

مش قادر تبطل نظر على النساء في الشارع مثلاً ..

مش قادر تبطل أغاني ..

مش قادرة تسيب لبسها الضيق اللي اتعودت عليه ..

أي ذنب من الذنوب اللي بنعملها واحنا مش عارفين انها ذنوب ..

أو عارفين ، بس مش قادرين نبطلها !

الذنوب دي للأسف بتقفل القلب وتحجب عنه الرؤية : (

وبالتالي تحجب عننا لذة الطاعة وحلاوة طعمها ..

.................................

وطبعاً احنا محتاجين قلوبنا ..

لما أطلبه في الذِكر .. ألاقيه

لما أطلبه في القيام .. ألاقيه

في السحور ... ألاقيه

في الدعاء .. ألاقيه

طيب إيه الحل ؟!

اننا نبتدي ندور على العلاج !!

طيب فكروا معايا كدة ..

إيه ممكن يكون علاج حالتنا دي ؟

جزاكى الله خيرا يأمة الله دايما مواضيعك بجد متميزة

فعلا ساعات كتير بيحصل معايا كدة ويمكن بالاكتر فالصلاة لانها بتكون بشكل يومى وخمس مرات فاليوم
فأوقات بحس انها شئ معتاد زى مثلا بقوم من النوم بغسل وشى دة عادى فالصلاة بتبقى نفس الحكاية
بصراحة انا مش عارفة اعمل ايه
انا جه عليا وقت لما بيحصل معايا كدة بقعد بعد صلاة الفرض اصلى وكأنى بعاقب نفسى وبجد ساعات بفضل اعيط بجد
مش عارفة وقتها بحس ان ربنا هو اللى مش عايزنى اتكلم معاه او اكون معاه فبجد ببقى تقريبا فى حالة غير طبيعية لما بيحصل كدة
بس انا اعتقد ان سبب دة ان ولا اعوذ بالله فى ناس بتبقى مشغولة بشئ اخر

وفى حاجة تانية ودة انا لما بعمل ذنب اوحتى او اكون مقصرة فى اى حاجة
فربنا يرحمنا برحمته