خلي بالك .. Battary low !!

!! Battary low

لما بتسمع الموبايل بتاعك عمل صوت انذار علشان ينبهك ان بطارية الجهاز الشحن اللي فيها قرب يخلص ..

بتعمل إيه ؟!

بتجري طبعاً تركب الموبايل على الشاحن في الكهرباء علشان تُعيد شحن البطارية وتقدر تستخدم الموبايل من غير ما يفصل منك ..

صح ؟!

طيب وقلبك .. لما يقرب يفصل شحن بتعمل إيه ؟!

أكيد احنا محتاجين من وقت لآخر اننا نسمع حاجة أو نقرأ حاجة أو نتدبر معنى حاجة أو نعمل حاجة علشان يزيد الشحن الإيماني في القلب ..

فلما الشحن الإيماني ده يزيد تلاقي همتك ارتفعت جداً ..

ولما الهمة ترتفع جداً ، تلاقي نفسك عندك طاقة عجيبة ( بفضل الله ) ، و نفسك تعمل حاجات كثير علشان تقرب من ربنا وعلشان ربنا يرضى عنك ..

وتفضل فترة بعدها شغال كويس في طاعة ربنا ومبسوط بالعبادة وحاسس بالقرب من ربنا ..

لكن بعد فترة ممكن يغلبك الروتين وتغلبك مشاغل الدنيا ، وتلاقي نفسك بدأت تهبط ..

والهمة بدأت تنزل ..

فتحس ان قلبك بدأ يستغيث علشان عايز يتشحن تاني ..

بتلاقي نفسك محتاج حاجة تجدد الطاقة الإيمانية في قلبك ، وتزود الشحن الإيماني عندك علشان تقدر تواصل ..

يا ترى إيه هي الحاجة اللي بتحس انها بتزود طاقتك الإيمانية ؟!

يعني مثلاً لما بتسمع درس لأحد الشيوخ ؟!

وللا لما بتقرأ في القرآن وتفسيره ؟!

وللا لما بتقرأ كتاب مثلاً ؟!

وإيه اللي بيأثر في قلبك أكثر .. لما تسمع عن الجنة وللا عن النار ؟!

وإيه الأعمال اللي بتحس انها بتجدد الإيمان في قلبك وتقويه ؟!

وهل بتحرص انك تشحن قلبك قبل ما يفصل شحن ؟!