آراء اسلامية حول العمل المختلط

السلام عليكم ورحمة الله وبركاته

تفتكروا يا جماعة يعنى ايه عمل خيرى

هتقولوا يعنى نشاط معين بنقوم بيه بهدف نشر الخير وخدمة المجتمع

هقولوكوا جميل جداً وده فعلاً مصداقاً لقول الحق " من عمل صالحاً من ذكر أو أنثى وهو مؤمن فلنحيينه حيوة طيبة ولنجزينهم أجرهم بأحسن ما كانوا يعملون " النحل 97

طيب تفتكروا إيه الفرق بين عمل الخير اللى بيعملوا ناس ملتزمة وناس مش ملتزمة

بعضكم هايقولى النية الصادقة

برضوا جميل جداً بس تفتكروا النية لوحدها كفاية … هااااا

اسمحولى اقولكم طبعاً لأ لأن الحرامى ممكن يسرق ونيته يأكِل عياله

يبقى نستنتج إن النية الصادقة مع الفعل السليم هما نواة اى عمل

إن شاء الله متفقين

هعرض بقى عليكم نماذج لبعض المواقف اللى ممكن تكون قابلتنا وأكيد هاتقابلكوا وهاسيبكم تحكموا

شاب (نيته صادقة) وفتاة (نيتها صادقة) قاعدين لوحدهم لمتابعة بعض أعمال نشاط ما تفتكروا ده صح ولا غلط

اللى هايقول غلط خليه على جنب

اللى هايقول صح .. عادى .. أمال يعملوا إيه إذا كان مفيش غيرهم

ردى عليه هايكون حديث لسيد الخلق صلى الله عليه وسلم ( عن ابن عباس رضى الله عنهما أن رسول الله صلى الله عليه وسلم قال " لا يخلوَن أحدكم بامرأة إلا مع ذى محرم " رواه البخارى ومسلم

وطبعاً كلنا عارفين يعنى ايه محرم واللى مش عارف ممكن يسأل

يا نهار ابيض معنى كدة ان ماينفعش واحد وزميلته يقعدوا يشوفوا اخبار النشاط ايه حتى لو كان بالضوابط

طبعاً لأ اذا كانت الضوابط تمنع القعدة دى من اساسها

الله طب ايه الحل احنا عايزين ايجابية .. الحل بسيط جداً .. ركزززززززززوا معايا

نفترض مثلاً ان العبد لله مسئول عن نشاط ما ممثلاً عن الولاد ومعايا بنت واحدة ممثلة عن البنات نعمل ايه عشان نتابع النشاط ده

مبدئياً كدة لازم نبتعد عن الفردية فى الاختيارات يعنى ماينفعش يبقى ولد وبنت وبالتالى يُفَضل (ويبقى غير محبذ) ولدين وبنتين وبالضوابط الشرعية ( غض بصر وعدم هزار …….. )

طب لو عدد المتطوعين قليل يبقى بكل بساطة هاقولكم يبقى الولد يفضل للولاد والبنت تفضل للبنات وبلاش اتصال من الاساس وده الاصل اللى المفروض نمشى عليه سواء عدد المتطوعين كبير ولا قليل

طيب لو البنات عايزين مساعدة من الشباب

يبقى ساعتها يتحدد معاد اجتماع للاسرة كلها وتتعرض الاحتياجات المختلفة ونعمل زى ماسيدنا موسى عمل مع الاختين ( نساعد بكل مروءة وشهامة وباااااااس خلاص يا بنى كفاية كدة الف شكر ) وبلاش بقى نغمة ربنا يكرمك والله مش عارفين منغيركوا كنا عملنا ايه وربنا يعزكوا ونقعد ندعى لبعض لحد اما نااااااخد على بعض ونبقى اخوات ( طبعاً فاهمينى )

طب لو مانفعش نعمل الاجتماع ده نعمل ايه

هاقولكم بكل بساطة أنهى أحسن اسمع كلام ربنا وأوامره ولا اتنازل نص ساعة كدة عشان خاطر العمل الخيرى عايز كدة

أعتقد الصادق منكم هايختار الاولانية .... والله ولا حتى جزء من الثانية يستاهل اتنازل عن أوامر ربنا

الله انت يا عم متزمت كدة ليه مش الضرورات تبيح المحظورات برضه

اصبر بس عليا الكلام ده لما تنقضى كوووووووووووووووووووووول محاولات الفعل الحلال (انما مش من اول قلم اعترف)

وخلوا بالكوا احنا اللى بنعتبر التنازلات دى ضرورات وهى فعلاً لا ضرورات ولا حاجة

فى الاخر بس احب اركز على الجزئية الشهيرة بتاعة انك (لو على الفطرة) ماتقبلش اختك تعمل كدة وانك (لو على الفطرة) ماتقبليش اخوكى يعمل كدة لأنها فعلاً جزئية قوية جداً

وأحب أفكركم بكلام الحبيب صلى الله عليه وسلم أعمل ما شئت فكما تدين تدان

يا جماعة اعذرونى على الاطالة ولكن الموضوع يستحق

اللهم قد بلغت اللهم فاشهد

سبحانك اللهم وبحمدك نشهد أن لا إله الإ أنت نستغفرك ونتوب إليك